देवळी नगरपरिषद निवडणुकीत खळबळ : भाजप उमेदवार शोभा तडस यांच्या सुनेने मागितली भीक.
वर्धा (मंगेश चोरे पाटील)
देवळी नगरपरिषदेच्या नगराध्यक्ष पदाच्या निवडणुकीत उभ्या असलेल्या भाजप उमेदवार शोभा तडस यांच्या सुनबाई सौ. पूजा पंकज तडस यांनी देवळीच्या मुख्य चौकात भीक मागत बसली यामुळे मोठी खळबळ उडाली आहे. पूजा तडस यांनी खाली बरदाना अंथरून, पुढे कटोरा घेऊन आपल्या लहान मुलाच्या दुधासाठी व उदरनिर्वाहासाठी भीक मागितली.
“तडस कुटुंबाची सून असूनही भीक मागण्याची वेळ का आली?” असा प्रश्न नागरिकांमधून उपस्थित झाला असून, या घटनेमुळे तडस कुटुंबातील वाद पुन्हा एकदा चव्हाट्यावर आला आहे.
या प्रकरणाची पार्श्वभूमी अशी की, माजी खासदार रामदासजी तडस यांचा मुलगा पंकज याच्याशी संबंधित वैयक्तिक वादातून पूजा तडस यांना अनेक अडचणींना सामोरे जावे लागल्याचा आरोप पूजा तडस यांनी केला आहे. न्यायासाठी त्यांनी पोलीस ठाणे, प्रसारमाध्यमे तसेच विविध पातळ्यांवर प्रयत्न केल्याचे त्या सांगतात. या प्रकरणाची चर्चा राज्याबाहेरपर्यंत गेल्यानंतर विवाह झाला, मात्र त्यानंतरही वाद संपले नसल्याचा दावा आहे.
पूजा तडस यांनी सांगितले की, सध्या त्यांच्या हातात कोणतेही स्थिर उत्पन्नाचे साधन नाही. मुलाच्या संगोपनाची जबाबदारी एकट्याने पेलावी लागत असल्याने आणि उदरनिर्वाहाकरिता साधन नसल्याने आपल्याला भीक मागण्याची वेळ आली आहे.
दरम्यान, या संपूर्ण घटनेचा थेट परिणाम निवडणूक वातावरणावर होत असून, देवळी शहरात या प्रकाराची मोठी चर्चा सुरू आहे. “देवा, अशी वेळ कुणावरही येऊ नये,” अशी भावना अनेक नागरिक व्यक्त करत आहेत.
Leave a Reply